کراچی پولیس آفس کی ویلفیئر برانچ نے پولیس اہلکاروں اور ان کے اہل خانہ کو فراہم کی جانے والی طبی سہولیات کا جائزہ لینے کے لیے تین اسپتالوں کا اچانک دورہ کیا۔ انچارج ویلفیئر برانچ انسپیکٹر شرافت خان نے کہا کہ اہلکاروں کو بہتر طبی سہولیات کی فراہمی ترجیح ہے۔
انچارج ویلفیئر برانچ نے سب انسپکٹر شاہد کے ہمراہ ہل پارک اسپتال، ایل آر بی ٹی اسپتال اور چنیوٹ اسپتال کورنگی کا دورہ کیا۔ انہوں نے ہر اسپتال میں انتظامات کا معائنہ کیا۔
ہل پارک اسپتال میں انہوں نے ویلفیئر آفیسر اے ایس آئی ہمایوں کاظمی سے ملاقات کی۔ انہوں نے زیر علاج کانسٹیبل سلیم کی عیادت بھی کی۔ علاج، سہولیات اور درپیش مسائل پر بریفنگ لی گئی۔ انہوں نے انتظامیہ سے بہتر سہولیات اور کمرہ تبدیل کرنے پر بھی بات کی۔
ایل آر بی ٹی اسپتال میں انہوں نے فوکل پرسن انسپیکٹر طالب اور عملے کی کارکردگی کا جائزہ لیا۔ مریضوں کا ریکارڈ بھی دیکھا گیا۔ انہوں نے زیر علاج پولیس اہلکاروں سے ملاقات کی اور فوکل ٹیم کی خدمات کو سراہا۔
چنیوٹ اسپتال کورنگی میں انسپیکٹر شرافت خان نے فوکل پرسن کانسٹیبل سعید سے ملاقات کی۔ انہوں نے مریضوں کو دی جانے والی سہولیات کا جائزہ لیا اور انتظامات پر اطمینان کا اظہار کیا۔
ترجمان کراچی پولیس کے مطابق ویلفیئر برانچ پولیس اہلکاروں اور ان کے اہل خانہ کو بہتر طبی سہولیات کی فراہمی یقینی بنانے کے لیے اسپتالوں کی نگرانی کا سلسلہ جاری رکھے گی۔
