کسٹمز کارروائی کے دوران جناح انٹرنیشنل ایئرپورٹ کراچی پر حکام نے دو الگ کارروائیوں میں اسمگلنگ کی بڑی کوششیں ناکام بنا دیں۔ پہلی کارروائی میں دبئی سے آنے والے ایک مسافر کے قبضے سے مجموعی طور پر تقریباً ایک کروڑ 40 لاکھ روپے مالیت کا اسمگل شدہ سامان برآمد ہوا۔
کسٹمز حکام کے مطابق مسافر نے اپنے جسم پر 10 اونس وزنی 10 پلاٹینم بارز مہارت سے چھپا رکھی تھیں۔ تلاشی کے دوران حکام نے یہ بارز برآمد کر لیں۔ اس کے علاوہ مسافر کے سامان سے 184 انٹیل پروسیسرز، 8 آئی فونز، ایک لیپ ٹاپ اور دیگر قیمتی الیکٹرانک اشیا بھی ضبط کر لی گئیں۔
حکام نے تمام برآمد شدہ سامان اپنی تحویل میں لے کر مسافر کے خلاف کسٹمز قوانین کے تحت مقدمہ درج کر لیا ہے، جبکہ مزید قانونی کارروائی جاری ہے۔
دوسری کارروائی میں دبئی سے آنے والی ایک خاتون مسافر کے ہینڈ پرس کی تلاشی کے دوران 229 قیراط لیبارٹری گرون ہیرے برآمد ہوئے۔ کسٹمز حکام کے مطابق ان ہیروں کی مالیت تقریباً 20 لاکھ روپے ہے۔
کسٹمز حکام کا کہنا ہے کہ دونوں کارروائیاں جناح انٹرنیشنل ایئرپورٹ پر اسمگلنگ کی روک تھام کے لیے جاری اقدامات کا حصہ ہیں، اور غیر قانونی اشیا کی اسمگلنگ کے خلاف کارروائیاں آئندہ بھی جاری رہیں گی۔
