آبنائے ہرمز میں دو اماراتی آئل ٹینکرز ایرانی کروز میزائل حملے کی زد میں آ گئے۔ متحدہ عرب امارات کی وزارتِ دفاع نے حملے کی تصدیق کر دی۔
وزارتِ دفاع کے مطابق حملے میں ایک بھارتی ملاح ہلاک ہوا۔ مزید آٹھ افراد زخمی ہوئے، جن میں چار کی حالت تشویشناک ہے۔
حکام نے بتایا کہ زخمیوں میں چھ بھارتی اور دو یوکرینی شہری شامل ہیں۔ حملہ اس وقت ہوا جب دونوں ٹینکرز عمان کی سمندری حدود سے گزر رہے تھے۔
وزارت کے مطابق ہلاک ہونے والا ملاح آئل ٹینکر مومباسا بی پر سوار تھا۔ دونوں جہاز آبنائے ہرمز کے جنوبی بحری راستے سے گزر رہے تھے۔
بعد ازاں ابوظبی نیشنل آئل کمپنی کی شپنگ کمپنی ADNOC L&S نے بھی واقعے کی تصدیق کی۔ کمپنی کے مطابق مومباسا بی اور البہیہ کو حملے میں نقصان پہنچا۔
وزارتِ دفاع نے بتایا کہ حملے کے بعد دونوں ٹینکرز میں آگ بھڑک اٹھی۔ تاہم امدادی ٹیموں نے آگ پر قابو پا لیا۔
دوسری جانب بھارت کی وزارتِ خارجہ نے نئی دہلی میں ایران کے نائب سفیر کو طلب کر لیا۔ وزارت نے حملے پر اپنا احتجاج بھی ریکارڈ کرایا۔
ادھر ایران کے پاسدارانِ انقلاب نے دعویٰ کیا کہ اس نے آبنائے ہرمز میں دو سپر ٹینکرز کو نشانہ بنایا۔ ایرانی حکام کے مطابق جہازوں نے متعدد وارننگز نظر انداز کیں اور نیوی گیشن سسٹم بھی بند رکھا۔
تاہم پاسدارانِ انقلاب نے متاثرہ جہازوں کے نام جاری نہیں کیے۔ ایران نے یہ بھی واضح نہیں کیا کہ آیا یہ وہی ٹینکرز تھے جن کا ذکر اماراتی حکام نے کیا ہے۔
