کراچی: فلمی منصوبے سندھ حکومت کی ترجیحات میں شامل ہیں، اور ان کی تکمیل، نمائش، عالمی تقسیم اور ڈیجیٹل تشہیر کو مزید مؤثر بنانے کے لیے عملی اقدامات تیز کرنے کا فیصلہ کیا گیا۔ یہ فیصلہ سندھ کے سینئر وزیر شرجیل انعام میمن کی زیر صدارت محکمہ اطلاعات کے فلم اوورسائیٹ بورڈ کے اجلاس میں کیا گیا۔
اجلاس میں محکمہ اطلاعات کے تحت جاری فلمی منصوبوں کی پیش رفت، مستقبل کی حکمت عملی، فلموں کی نمائش، ملکی اور بین الاقوامی سطح پر تقسیم، فلم فیسٹیولز میں شرکت، نجی شعبے کے ساتھ اشتراک اور جدید تشہیری طریقہ کار پر تفصیلی غور کیا گیا۔
اجلاس میں سیکریٹری اطلاعات کاشف گلزار شیخ، ڈائریکٹر جنرل اطلاعات معز پیرزادہ، ڈائریکٹر فلمز حزب اللہ میمن، بورڈ کے ارکان ژالے سرحدی، وقاص رضوی اور دیگر متعلقہ حکام نے شرکت کی۔
شرجیل انعام میمن نے کہا کہ سندھ حکومت فلم اور تخلیقی صنعت کے فروغ کے لیے سنجیدہ اور عملی اقدامات کر رہی ہے۔ ان کا کہنا تھا کہ معیاری فلمیں سندھ اور پاکستان کی ثقافت، تاریخ، سیاحت اور سماجی اقدار کو عالمی سطح پر مؤثر انداز میں اجاگر کرنے کا اہم ذریعہ ہیں۔
انہوں نے کہا کہ فلمی منصوبوں میں اعلیٰ معیار، جدید تقاضوں اور بین الاقوامی معیار کو ترجیح دی جا رہی ہے تاکہ مقامی فلمیں عالمی سطح پر بھی اپنی جگہ بنا سکیں۔
شرجیل انعام میمن نے اس بات پر زور دیا کہ موجودہ دور میں او ٹی ٹی پلیٹ فارمز اور سوشل میڈیا فلموں کی کامیابی میں کلیدی کردار ادا کرتے ہیں۔ انہوں نے ہدایت کی کہ سندھ حکومت کے فلمی منصوبوں کو ڈیجیٹل پلیٹ فارمز کے ذریعے وسیع پیمانے پر متعارف کرایا جائے تاکہ زیادہ سے زیادہ ناظرین تک رسائی حاصل کی جا سکے۔
انہوں نے مزید کہا کہ فلم انڈسٹری کے فروغ سے نوجوان ہدایت کاروں، مصنفین، فنکاروں اور دیگر تخلیق کاروں کو نئے مواقع میسر آئیں گے، جبکہ اس سے صوبے کی تخلیقی معیشت کو بھی تقویت ملے گی۔
