زیادتی کے ایک مبینہ واقعے میں کراچی کے علاقے کلاکوٹ میں پانچ اور سات سال کی دو کمسن بچیوں کے ساتھ مبینہ جنسی زیادتی کی اطلاع پر پولیس نے کارروائی کرتے ہوئے بچیوں کے والد کو حراست میں لے لیا ہے اور اس سے تفتیش جاری ہے۔
ڈسٹرکٹ سٹی پولیس کراچی کے ترجمان کے مطابق پولیس کو اطلاع ملی کہ دو کمسن بچیوں کے ساتھ مبینہ زیادتی کا واقعہ پیش آیا ہے۔ ابتدائی طور پر بچیوں کی والدہ نے شک ظاہر کیا کہ اس مبینہ واقعے میں بچیوں کا والد ملوث ہو سکتا ہے، جس کے بعد پولیس نے فوری کارروائی کرتے ہوئے مشتبہ شخص کو حراست میں لے لیا۔
پولیس کا کہنا ہے کہ دونوں بچیوں کو طبی معائنے کے لیے سول اسپتال منتقل کیا گیا، جہاں ان کا میڈیکل مکمل کر لیا گیا ہے۔ تاہم واقعے سے متعلق حتمی رائے میڈیکل رپورٹ موصول ہونے کے بعد ہی دی جا سکے گی۔
ترجمان کے مطابق تفتیشی ٹیم تمام پہلوؤں کا باریک بینی سے جائزہ لے رہی ہے اور شواہد کی روشنی میں قانونی کارروائی آگے بڑھائی جائے گی۔
پولیس نے اس معاملے کی حساس نوعیت کے باعث عوام اور ذرائع ابلاغ سے اپیل کی ہے کہ غیر مصدقہ معلومات یا قیاس آرائیوں سے گریز کریں تاکہ تحقیقات متاثر نہ ہوں اور متاثرہ بچیوں کی شناخت اور حقوق کا تحفظ یقینی بنایا جا سکے۔
