آٹے کی قیمتیں مستحکم رکھنے کے لیے وزیراعلیٰ سندھ مراد علی شاہ نے ذخیرہ اندوزوں کے خلاف سخت کارروائی کا حکم دیا ہے۔ انہوں نے متعلقہ حکام کو مؤثر اقدامات یقینی بنانے کی ہدایت بھی کی۔
وزیراعلیٰ سندھ کی زیر صدارت صوبائی کابینہ کا اجلاس ہوا۔ اجلاس میں گندم کی دستیابی، ذخیرہ اندوزی اور محکمہ خوراک میں اصلاحات پر غور کیا گیا۔
اجلاس کو بریفنگ دی گئی کہ سندھ کو رواں مالی سال میں 15 لاکھ 90 ہزار ٹن گندم کی کمی کا سامنا ہے۔ اس پر مراد علی شاہ نے صورتحال کا نوٹس لیا۔ انہوں نے آٹے کی قیمتوں میں استحکام کے لیے ذخیرہ اندوزوں کے خلاف کارروائی کی ہدایت جاری کی۔
کابینہ نے محکمہ خوراک کو مکمل ڈیجیٹل بنانے کی تجویز پر بھی غور کیا۔ وزیراعلیٰ نے گندم کی خریداری، ذخیرہ اور ترسیل کو ڈیجیٹل نظام سے منسلک کرنے کی ہدایت دی۔ سندھ حکومت نے انٹیگریٹڈ ویٹ مینجمنٹ سسٹم متعارف کرانے کا بھی فیصلہ کیا۔
ترجمان وزیراعلیٰ سندھ کے مطابق اجلاس میں وفاق کی مجوزہ قومی گندم پالیسی 2026 سے 2030 کے مسودے کا جائزہ لیا گیا۔ مراد علی شاہ نے پالیسی کا تفصیلی جائزہ لینے کے لیے کابینہ کمیٹی تشکیل دے دی۔ کمیٹی اپنی سفارشات مقررہ مدت میں صوبائی کابینہ کو پیش کرے گی۔
