کراچی: معاشی ترقی کے ثمرات عام شہری تک پہنچانے کے لیے سربراہ پاکستان سنی تحریک محمد شاداب رضا نقشبندی نے حکومت پر زور دیا ہے کہ وہ عوام دوست معاشی پالیسیاں اختیار کرے، روزگار کے مواقع میں اضافہ کرے اور مہنگائی پر مؤثر قابو پاتے ہوئے کمزور طبقات کو حقیقی ریلیف فراہم کرے۔
فیصل عباسی قتل کیس: پاکستان بازار پولیس نے مرکزی ملزم سمیت تین افراد گرفتار کر لیے
مرکز اہلِ سنت سے جاری اپنے بیان میں محمد شاداب رضا نقشبندی نے کہا کہ ملک میں معاشی محرومیوں کا شکار 10 کروڑ سے زائد غریب افراد کو مشکلات سے نکالنے کے لیے مؤثر اور عملی اقدامات ناگزیر ہیں۔ انہوں نے کہا کہ معاشی استحکام کے لیے ضروری ہے کہ ملکی معیشت کے معاملات میں بیرونی مداخلت کا خاتمہ کیا جائے۔
انہوں نے کہا کہ صرف معاشی ترقی کی شرح میں اضافہ غربت کے خاتمے کے لیے کافی نہیں، کیونکہ معاشی عدم مساوات، محدود روزگار کے مواقع اور انسانی ترقی کے شعبے میں کمزور کارکردگی کے باعث ترقی کے ثمرات غریب اور متوسط طبقے تک نہیں پہنچ رہے۔
شاداب رضا نقشبندی نے کہا کہ مسلسل بڑھتی ہوئی مہنگائی نے کم آمدنی والے گھرانوں کی مشکلات میں مزید اضافہ کر دیا ہے، جس کے نتیجے میں لاکھوں خاندان شدید معاشی دباؤ کا سامنا کر رہے ہیں۔
انہوں نے حکومت پر زور دیا کہ ایسی معاشی پالیسیاں تشکیل دی جائیں جو عوامی ضروریات اور زمینی حقائق سے ہم آہنگ ہوں۔ ان کے مطابق روزگار کے نئے مواقع پیدا کیے جائیں، مہنگائی پر مؤثر قابو پایا جائے اور کمزور طبقات کو حقیقی ریلیف فراہم کیا جائے تاکہ معاشی ترقی کے فوائد معاشرے کے ہر طبقے تک یکساں طور پر پہنچ سکیں۔
سربراہ پاکستان سنی تحریک نے مزید کہا کہ عوام کی فلاح و بہبود، غربت کے خاتمے اور پائیدار معاشی استحکام کے لیے شفاف، منصفانہ اور عوام دوست پالیسیوں کا نفاذ وقت کی اہم ضرورت ہے۔
