اسلام آباد: کرنل شیر خان نشانِ حیدر کی 27ویں برسی آج عقیدت و احترام سے منائی جا رہی ہے۔ اس موقع پر وزیراعظم شہباز شریف، وزیر داخلہ محسن نقوی اور پاکستان کی مسلح افواج نے کارگل جنگ کے ہیرو کو خراجِ عقیدت پیش کرتے ہوئے ان کی بہادری اور قربانی کو قومی تاریخ کا درخشاں باب قرار دیا۔
وزیراعظم شہباز شریف نے اپنے پیغام میں کہا کہ کیپٹن کرنل شیر خان شہید نے انتہائی ناموافق حالات میں غیر معمولی جرات، قیادت اور لازوال قربانی کا مظاہرہ کیا، جو پاکستان کی عسکری تاریخ میں ہمیشہ یاد رکھی جائے گی۔ انہوں نے کہا کہ مادرِ وطن سے وفاداری اور شجاعت کی اعلیٰ روایات کا عملی اظہار کرنل شیر خان شہید کی زندگی اور قربانی سے نمایاں ہوتا ہے۔
وزیراعظم نے کہا کہ وطنِ عزیز کا دفاع ایک مقدس فریضہ ہے اور پاکستان کے بہادر سپاہیوں کی قربانیوں کی بدولت ملک کا امن، استحکام اور خودمختاری محفوظ ہے۔
اس موقع پر فیلڈ مارشل سید عاصم منیر، چیف آف آرمی اسٹاف و چیف آف ڈیفنس فورسز، چیف آف دی نیول اسٹاف ایڈمرل نوید اشرف، چیف آف دی ایئر اسٹاف ایئر چیف مارشل ظہیر احمد بابر سدھو اور پاکستان کی مسلح افواج نے بھی کیپٹن کرنل شیر خان شہید کی خدمات اور قربانی کو خراجِ تحسین پیش کیا۔
پاک فوج کے شعبۂ تعلقاتِ عامہ (آئی ایس پی آر) کے مطابق کیپٹن کرنل شیر خان شہید نے 1999 کی کارگل جنگ کے دوران انتہائی مشکل حالات میں اگلے مورچوں پر رہتے ہوئے دشمن کا ڈٹ کر مقابلہ کیا۔ انہوں نے بے خوف قیادت، غیر معمولی جرات اور ثابت قدمی کا مظاہرہ کرتے ہوئے جامِ شہادت نوش کیا اور پاک فوج کی بہترین عسکری روایات کو برقرار رکھا۔
آئی ایس پی آر نے اپنے پیغام میں کہا کہ کیپٹن کرنل شیر خان شہید کی قربانی آج بھی قوم کے لیے حب الوطنی، عزم اور بہادری کی علامت ہے، جبکہ ان کی ایثار اور شجاعت کی داستان نئی نسل کو وطن کی خدمت اور دفاع کے جذبے سے ہمیشہ متاثر کرتی رہے گی۔
قومی قیادت اور مسلح افواج نے اس عزم کا بھی اعادہ کیا کہ پاکستان ان اعلیٰ اقدار اور نظریات کی پاسداری جاری رکھے گا، جن کے لیے کیپٹن کرنل شیر خان شہید نے اپنی جان کا نذرانہ پیش کیا، اور ان کی قربانی ہمیشہ قومی تاریخ کے تابندہ باب کے طور پر یاد رکھی جائے گی۔
