کاروکاری قتل کا ایک افسوسناک واقعہ جامشورو کے علاقے مانجھند کی یونین کونسل انڈ پور میں پیش آیا، جہاں 30 سالہ آٹھ ماہ کی حاملہ خاتون کو مبینہ طور پر فائرنگ کر کے قتل کر دیا گیا۔
پولیس کے مطابق مقتولہ خوشبو ماچھی کو اس کے سسرالیوں نے قتل کیا۔ واقعے کے بعد پولیس موقع پر پہنچی اور شواہد اکٹھے کیے۔
پولیس نے خاتون کی لاش تحویل میں لے لی اور اسے تعلقہ اسپتال مانجھند منتقل کر دیا۔ ابتدائی اطلاعات کے مطابق واقعے میں ابھی تک کوئی گرفتاری عمل میں نہیں آئی۔
واقعے کا نوٹس وزیراعلیٰ سندھ سید مراد علی شاہ نے لیا۔ انہوں نے آئی جی سندھ اور ایس ایس پی جامشورو سے فوری رپورٹ طلب کی۔
وزیراعلیٰ سندھ نے کہا کہ کاروکاری کے نام پر کسی معصوم جان کا قتل ایک وحشیانہ اقدام ہے۔ انہوں نے کہا کہ قانون کسی کو بھی ایسے جرائم کی اجازت نہیں دیتا۔
انہوں نے ہدایت کی کہ مقتولہ کے قتل میں ملوث افراد کو فوری گرفتار کیا جائے اور انہیں قانون کے کٹہرے میں لایا جائے۔
مراد علی شاہ نے کہا کہ مقتولہ کے پیٹ میں موجود 8 ماہ کے بچے کا قتل ایک دوہرا اور ہولناک جرم ہے۔ انہوں نے متاثرہ خاندان کو انصاف کی یقین دہانی بھی کرائی۔
وزیراعلیٰ نے کہا کہ ایسے سنگین جرائم میں ملوث افراد کسی بھی رعایت کے مستحق نہیں ہیں
