نائب وزیراعظم اور وزیر خارجہ اسحاق ڈار نے کہا ہے کہ ایران یورینیئم بیرونِ ملک منتقل نہیں کرے گا۔
انہوں نے کہا کہ ایران افزودگی کی سطح کم کرنے پر آمادہ ہے۔
عرب میڈیا کو انٹرویو دیتے ہوئے اسحاق ڈار نے بتایا کہ امریکا نے ابتدا میں مختلف شرائط پیش کی تھیں۔
ان کے مطابق امریکا چاہتا تھا کہ ایران افزودہ یورینیئم کے ذخائر بیرونِ ملک منتقل کرے۔
انہوں نے کہا کہ بعد ازاں مذاکرات میں ایک متبادل تجویز سامنے آئی۔
اس تجویز کے تحت ایران افزودگی کی سطح کم کرے گا۔
اسحاق ڈار نے کہا کہ جوہری پروگرام پر ایک تکنیکی ورکنگ گروپ کام کرے گا۔
انہوں نے بتایا کہ منجمد اثاثوں کے معاملے کے لیے بھی الگ گروپ تشکیل دیا گیا ہے۔
ان کے مطابق لبنان سے متعلق امور پر تیسرا ورکنگ گروپ کام کرے گا۔
وزیر خارجہ نے کہا کہ آبنائے ہرمز سے گزرنے والے جہازوں پر اضافی ٹیرف عائد نہیں ہوگا۔
انہوں نے مزید کہا کہ یہ سہولت 60 روز تک برقرار رہے گی۔
جہاز صرف معمول کی نیوی گیشن اور سروس فیس ادا کریں گے۔
اسحاق ڈار کے مطابق امریکی صدر ڈونلڈ ٹرمپ نے مذاکراتی عمل کی ذاتی طور پر نگرانی کی۔
انہوں نے کہا کہ سعودی عرب، قطر، مصر اور متحدہ عرب امارات ثالثی کی حمایت کر رہے ہیں۔
ان کا کہنا تھا کہ مذاکرات کا اگلا مرحلہ آسان نہیں ہوگا۔
تاہم انہوں نے امید ظاہر کی کہ فریقین حتمی معاہدے تک پہنچ جائیں گے۔
اسحاق ڈار نے کہا کہ مجوزہ معاہدے میں کوئی منفی نکتہ شامل نہیں۔
