اسلام آباد میں قومی اسمبلی کے اجلاس کے دوران سابق وزیراعظم اور پاکستان پیپلز پارٹی کی رہنما شہید بینظیر بھٹو کے 73ویں یومِ ولادت پر فاتحہ خوانی کی گئی اور ان کی جمہوریت و عوامی خدمت کے لیے خدمات کو خراجِ عقیدت پیش کیا گیا۔
لبیتم ایوارڈ: سراجیہ گروپ کی تقریب، جاوید شیخ لائف ٹائم اچیومنٹ ایوارڈ سے سرفراز
ایوان میں اظہارِ خیال کرتے ہوئے پیپلز پارٹی کے رکن اسمبلی اعجاز حسین جکھرانی نے کہا کہ شہید بینظیر بھٹو جمہوریت، خواتین کی بااختیاری اور سیاسی جرات کی علامت تھیں۔ انہوں نے کہا کہ بینظیر بھٹو نے اپنے سیاسی کیریئر میں جمہوری اقدار کے فروغ کے لیے مسلسل جدوجہد کی۔
انہوں نے کہا کہ بینظیر بھٹو دو مرتبہ وزیراعظم رہیں اور انہوں نے نہ صرف پاکستان بلکہ خطے کی سیاست پر بھی گہرے اثرات چھوڑے۔ ان کے مطابق ان کی شہادت صرف پاکستان نہیں بلکہ پورے خطے کے لیے ایک بڑا نقصان تھا۔
اعجاز جکھرانی نے کہا کہ شہید بینظیر بھٹو دنیا کی پہلی مسلم خاتون وزیراعظم تھیں اور انہوں نے ہمیشہ خواتین کے حقوق، سماجی ترقی اور جمہوری طرزِ حکمرانی کی حمایت کی۔ انہوں نے یہ بھی کہا کہ ان کے دور میں پاکستان کی دفاعی صلاحیتوں میں اضافہ ہوا۔
ان کا کہنا تھا کہ میزائل ٹیکنالوجی کے فروغ سے ملک کی دفاعی صلاحیت مزید مضبوط ہوئی، جبکہ بینظیر بھٹو آج بھی عوام کے دلوں میں زندہ ہیں۔
قومی اسمبلی کے اسپیکر سردار ایاز صادق کی درخواست پر حافظ میاں محمد نعمان نے ایوان میں فاتحہ خوانی کرائی اور شہید بینظیر بھٹو کے درجات کی بلندی کے لیے دعا کی۔
