کراچی: محکمہ ثقافت و سیاحت نوادرات کا اہم اجلاس صوبائی وزیر ثقافت و سیاحت سید ذوالفقار علی شاہ کی زیر صدارت منعقد ہوا، جس میں محکمے کی کارکردگی کا جائزہ لیا گیا اور متعدد اہم فیصلے کیے گئے۔
سندھ ہائیکورٹ کا غیرقانونی تعمیرات مسمار کرنے کا حکم، مختلف کیسز میں ضمانتیں منظور
اجلاس میں سیکریٹری ثقافت و سیاحت خیر محمد کلوڑ، ڈائریکٹر جنرل ثقافت، ڈی جی لائبریریز، ڈی جی گورکھ ہل اسٹیشن، ایم ڈی سیاحت اور دیگر متعلقہ افسران نے شرکت کی۔ ترجمان کے مطابق اجلاس میں وزیراعلیٰ سندھ کی جانب سے جاری کفایت شعاری پالیسی پر سختی سے عملدرآمد کی ہدایت کی گئی۔
اجلاس کے دوران صوبائی وزیر کو محکمے کی مجموعی کارکردگی پر بریفنگ دی گئی جبکہ آئندہ کے اقدامات پر بھی غور کیا گیا۔ اس موقع پر کراچی میں ڈرائیو اِن سنیما کو دوبارہ فعال کرنے کا فیصلہ کیا گیا، جس سے شہریوں کو تفریح کی جدید سہولت میسر آئے گی۔
اسی طرح کراچی سے سکھر تک ٹرین سفاری کے تیسرے مرحلے کے آغاز کا بھی فیصلہ کیا گیا، جبکہ حیدرآباد، میرپورخاص اور شہید بینظیرآباد کے آرٹس کونسلز کو فعال بنانے پر بھی غور کیا گیا۔
اجلاس میں مختلف لائبریریوں اور ثقافتی مراکز کو جلد عوام کے لیے کھولنے کا اعلان کیا گیا، جن میں وفا ناتھن شاہی لائبریری خیرپور ناتھن شاہ، مورو کلچر سینٹر اینڈ لائبریری اور کشمور پبلک لائبریری شامل ہیں۔
مزید برآں گورکھ ہل اسٹیشن پر گورکھ فیسٹیول منعقد کرانے اور کینجھر جھیل پر فیری سروس و واٹر اسپورٹس شروع کرنے کا فیصلہ بھی کیا گیا۔ حکام کے مطابق ہر ضلع میں ثقافتی و نمائشی تقاریب کے انعقاد کو بھی یقینی بنایا جائے گا۔
صوبائی وزیر سید ذوالفقار علی شاہ نے کہا کہ ڈرائیو اِن سنیما کی بحالی کے لیے باقاعدہ پلان تیار کیا جا رہا ہے جبکہ سیاحتی و ثقافتی مراکز کو مزید بہتر بنا کر عوام کو سہولیات فراہم کی جائیں گی۔ انہوں نے کہا کہ فنکاروں، ادیبوں اور شاعروں کے مسائل کے حل کے لیے آسان نظام متعارف کرایا جائے گا۔
انہوں نے مزید کہا کہ گورکھ ہل اسٹیشن پر ترقیاتی کاموں سے سیاحت کو فروغ ملے گا اور حالات بہتر ہونے پر گورکھ فیسٹیول کا انعقاد کیا جائے گا، جبکہ وزیراعلیٰ سندھ کی ہدایات پر محکمے میں کفایت شعاری پالیسی پر مکمل عملدرآمد جاری ہے۔
