ڈپٹی میئر کراچی سلمان عبداللہ مراد نے جماعت اسلامی کراچی کے امیر منعم ظفر خان کے بیان پر سخت ردعمل دیتے ہوئے کہا ہے کہ جماعت اسلامی نے شہر کو احتجاج اور دھرنوں کے سوا کچھ نہیں دیا۔
اپنے بیان میں انہوں نے کہا کہ کراچی کو نعروں اور بیانات سے نہیں بلکہ عملی کاموں سے ترقی ملتی ہے۔ ’’جنہوں نے برسوں شہر پر سیاست کی، وہ آج کارکردگی کا لیکچر دے رہے ہیں‘‘، ڈپٹی میئر کا کہنا تھا۔
سلمان عبداللہ مراد نے کہا کہ جماعت اسلامی کا ریکارڈ خالی ہے، نہ کوئی منصوبہ، نہ زمینی خدمت۔ ’’پیپلزپارٹی نے شہر میں ترقیاتی کام کیے، جبکہ جماعت اسلامی نے صرف شور مچایا اور جلسے کیے‘‘۔
انہوں نے مزید کہا کہ ’’جو لوگ ہمیشہ احتجاج کی سیاست کرتے رہے، وہ آج خدمت کا دعویٰ کر رہے ہیں۔ کراچی کے شہری جانتے ہیں کہ کون کام کرتا ہے اور کون صرف سیاست‘‘۔
ڈپٹی میئر نے کہا کہ پیپلزپارٹی نے شہر کے مسائل کے حل کے لیے عملی اقدامات کیے ہیں اور شہریوں نے اس خدمت کا صلہ ووٹ کی شکل میں دیا ہے۔
