پاکستان پیپلز پارٹی کے چیئرمین بلاول بھٹو زرداری نے کہا ہے کہ نئے صوبوں کے قیام کے لیے ریفرنڈم غیر آئینی اقدام ہوگا۔ اپنی مرضی کا ماحول بنا کر زور زبردستی سے بات نہیں بنے گی۔
نجی ٹی وی ہم نیوز کو انٹرویو دیتے ہوئے بلاول بھٹو نے کہا کہ ملک میں مہنگائی اور بے روزگاری میں خوف ناک اضافہ ہورہا ہے۔ معاشی مشکلات کم ہونے کے بجائے بڑھ رہی ہیں۔
انہوں نے کہا کہ تمام اسٹیک ہولڈرز کی توجہ عوام کو ریلیف دینے پر ہونی چاہیے۔
نئے صوبوں اور ریفرنڈم پر مؤقف
بلاول بھٹو نے کہا کہ نئے صوبوں پر ریفرنڈم کی بات پیپلز پارٹی نے شروع نہیں کی۔ ایک بحث شروع ہوئی تو انہوں نے اپنا مؤقف پیش کیا۔
ان کا کہنا تھا کہ پریس کانفرنس میں کسی کو دھمکی نہیں دی تھی۔ انہوں نے صرف ممکنہ خطرے سے آگاہ کیا تھا۔
انہوں نے کہا کہ ریفرنڈم کے ذریعے صوبے بنانے کی تجویز سامنے آئی۔ اس معاملے پر بڑے اسٹیک ہولڈر ہونے کے باوجود ان سے مشاورت نہیں کی گئی۔
بلاول بھٹو کے مطابق صدر آصف علی زرداری اور محسن نقوی کی ملاقات میں نئے صوبوں پر بات نہیں ہوئی۔ ایوان صدر نے بھی اس حوالے سے وضاحت جاری کی تھی۔
انہوں نے کہا کہ ریفرنڈم غیر آئینی ہے اور آئین کا آرٹیکل 239 واضح طریقہ کار فراہم کرتا ہے۔ آئین کو ایک طرف رکھ کر ریفرنڈم کرانا مناسب نہیں ہوگا۔
گلگت بلتستان اور جنوبی پنجاب کا الگ تناظر
پیپلز پارٹی چیئرمین نے کہا کہ گلگت بلتستان کو صوبے کی حیثیت دینے اور جنوبی پنجاب صوبے کا معاملہ الگ ہے۔
ان کے مطابق جنوبی پنجاب صوبے سے متعلق پنجاب اسمبلی میں قرارداد بھی منظور ہوچکی ہے۔
بلاول بھٹو نے کہا کہ سندھ کے عوام سے یہ نہیں پوچھا جاسکتا کہ پنجاب میں نیا صوبہ بننا چاہیے یا نہیں۔ اسی طرح کسی دوسرے صوبے میں بھی سندھ کی تقسیم سے متعلق رائے نہیں لی جاسکتی۔
انہوں نے کہا کہ آئین کو نظرانداز کرکے اپنی مرضی کا ماحول بنانا اور زور زبردستی کرنا کامیاب نہیں ہوگا۔
سسٹم ری سیٹ اور انتخابی اصلاحات
بلاول بھٹو نے کہا کہ سسٹم کولیپس کرنے کا معاملہ پیپلز پارٹی نے شروع نہیں کیا۔ ان کے مطابق محسن نقوی نے سسٹم ری سیٹ کرنے کی بات شروع کی تھی۔
انہوں نے سوال کیا کہ کیا سسٹم ری سیٹ پر بات کرنے کا حق صرف محسن نقوی کو حاصل ہے؟
انتخابی عمل پر بات کرتے ہوئے بلاول بھٹو نے کہا کہ پہلے اپوزیشن دھاندلی کا الزام لگاتی تھی اور حکومت اسے مسترد کرتی تھی۔ تاہم پہلی مرتبہ حکومتی اور اپوزیشن نمائندے بھی دھاندلی کی بات کررہے ہیں۔
انہوں نے کہا کہ الیکشن کمیشن کی ساکھ اور انتخابی عمل کی صورتحال تاریخ میں اتنی خراب نہیں رہی۔ اب کوئی اس نظام میں شفاف انتخابات کے انعقاد پر یقین کرنے کو تیار نہیں۔
بلاول بھٹو نے سوال اٹھایا کہ انتخابی اصلاحات سے پہلے ریفرنڈم یا نئے انتخابات کیسے ممکن ہیں؟ ان کے مطابق موجودہ نظام میں ریفرنڈم سے عوام کی حقیقی رائے سامنے آنے پر بھی سوالات ہیں۔
پی ٹی آئی کی پارلیمانی سیاست میں واپسی
اپوزیشن سے متعلق سوال پر بلاول بھٹو نے کہا کہ پیپلز پارٹی چاہتی ہے کہ تحریک انصاف پارلیمانی سیاست کا حصہ بنے۔
انہوں نے پی ٹی آئی کی مخصوص نشستوں کے معاملے پر بات چیت کی ضرورت پر زور دیا۔ ان کا کہنا تھا کہ اگر پیپلز پارٹی یہ نشستیں نہ لیتی تو کسی دوسری جماعت کو مل جاتیں۔
چیئرمین پیپلز پارٹی نے کہا کہ کرپشن ایک ناسور ہے جو پورے ملک میں پھیل چکا ہے۔

