صدر مملکت آصف علی زرداری نے ماڈل ٹاؤن میں وزیراعظم محمد شہباز شریف کی رہائش گاہ کا دورہ کیا۔
وزیراعظم شہباز شریف نے صدر مملکت کا پرتپاک استقبال کیا۔ ملاقات میں ملک کی مجموعی سیاسی، معاشی اور سیکیورٹی صورتحال پر تفصیلی گفتگو ہوئی۔
دورہ ترکیہ اور عالمی کانفرنس پر گفتگو
وزیراعظم نے صدر مملکت کو اپنے دورۂ ترکیہ اور 31ویں کانفرنس آف پارٹیز (COP31) میں شرکت کے بارے میں آگاہ کیا۔
ملاقات میں اتحادی جماعتوں کے درمیان باہمی تعاون اور مشاورت کا سلسلہ جاری رکھنے پر بھی تبادلہ خیال ہوا۔ اس کے علاوہ عوامی فلاحی منصوبوں کی پیشرفت کا جائزہ لیا گیا۔
معاشی استحکام کے لیے مشترکہ عزم
دونوں رہنماؤں نے ملک میں معاشی استحکام اور ترقیاتی عمل تیز کرنے کے لیے مل کر کام کرنے کے عزم کا اعادہ کیا۔
ملاقات میں اسپیکر قومی اسمبلی سردار ایاز صادق، سابق وزیراعظم راجہ پرویز اشرف، سینیٹر سلیم مانڈوی والا اور وزیر قانون اعظم نذیر تارڑ شریک تھے۔
اس موقع پر وزیراعظم کے مشیر رانا ثناء اللہ اور رکن قومی اسمبلی میاں حمزہ شہباز شریف بھی موجود تھے۔
