سیکیورٹی فورسز نے خیبر پختونخوا میں انٹیلی جنس بنیادوں پر کارروائیاں کرتے ہوئے بھارتی سرپرستی میں سرگرم 74 دہشت گردوں کو ہلاک کر دیا۔
پاک فوج کے شعبہ تعلقات عامہ (آئی ایس پی آر) کے مطابق کارروائیوں میں دہشت گردوں کے ٹھکانوں کو مؤثر انداز میں نشانہ بنایا گیا۔ اس دوران بھاری مقدار میں اسلحہ، گولہ بارود اور دھماکا خیز مواد بھی برآمد ہوا۔
کرم میں 31 خوارج ہلاک
آئی ایس پی آر کے مطابق 3 نومبر سے ضلع کرم میں دہشت گردوں کے خلاف انٹیلی جنس بنیادوں پر کارروائیاں جاری ہیں۔ متعدد جھڑپوں کے دوران بھارتی سرپرستی میں سرگرم 31 خوارج ہلاک کیے گئے۔
کارروائیوں کے دوران دہشت گردوں کے ٹھکانوں سے اسلحہ، گولہ بارود اور دھماکا خیز مواد بھی برآمد کیا گیا۔
میر علی اور اورکزئی میں 43 دہشت گرد ہلاک
دوسری جانب خیبر پختونخوا کے مختلف علاقوں میں آپریشنز کا دائرہ میر علی اور اورکزئی تک بڑھا دیا گیا ہے۔
آئی ایس پی آر کے مطابق گزشتہ 48 گھنٹوں کے دوران سیکیورٹی فورسز نے میر علی میں 35 اور اورکزئی میں 8 خوارج کو ہلاک کیا۔
ان کارروائیوں میں دیسی ساختہ دھماکا خیز مواد، آئی ای ڈیز اور بڑی تعداد میں اسلحہ و گولہ بارود بھی برآمد ہوا۔ اس طرح تینوں علاقوں میں ہلاک دہشت گردوں کی مجموعی تعداد 74 ہوگئی۔
علاقوں میں موجود باقی ماندہ دہشت گردوں کے خاتمے کے لیے کلیئرنس آپریشنز جاری ہیں۔
عزمِ استحکام کے تحت کارروائیاں جاری رکھنے کا اعلان
آئی ایس پی آر کا کہنا ہے کہ وفاقی ایپکس کمیٹی کی منظور کردہ قومی ایکشن پلان کی حکمت عملی ’’عزمِ استحکام‘‘ کے تحت کارروائیاں پوری رفتار سے جاری رہیں گی۔
سیکیورٹی فورسز اور قانون نافذ کرنے والے ادارے دہشت گردی کے خلاف کارروائیاں جاری رکھیں گے۔ مقصد ملک سے بیرونی سرپرستی میں ہونے والی دہشت گردی کا مکمل خاتمہ ہے۔
صدر، وزیراعظم اور دیگر رہنماؤں کا خراجِ تحسین
صدر مملکت آصف علی زرداری، وزیراعظم شہباز شریف اور وزیر داخلہ محسن نقوی سمیت دیگر سیاسی رہنماؤں نے سیکیورٹی فورسز کو خراجِ تحسین پیش کیا ہے۔
