سعودی عرب نے دعویٰ کیا ہے کہ اس کے فضائی دفاعی نظام نے مکہ مکرمہ کی جانب آنے والے دو بیلسٹک میزائل فضا میں ہی تباہ کردیے۔ میزائلوں کا ملبہ علاقے کے دو مقامات پر گرا۔
خبر رساں ادارے رائٹرز کے مطابق سعودی سول ڈیفنس نے میزائلوں کو روکنے کی تصدیق کی۔ ادارے کے مطابق تباہ ہونے والے میزائلوں کا ملبہ مکہ مکرمہ کے نواحی علاقوں میں گرا۔
ملبہ دو مقامات پر گرنے کی تصدیق
سعودی سرکاری ٹیلی وژن نے میزائلوں کے ملبے کے مقامات کی نشاندہی کی۔ ایک مقام صبوحہ گاؤں ہے، جو مسجد الحرام سے تقریباً 35 کلومیٹر شمال مشرق میں واقع ہے۔
دوسرا مقام وادی المغمس ہے، جو مسجد الحرام سے تقریباً 21 کلومیٹر مشرق میں واقع ہے۔
سعودی سول ڈیفنس کے مطابق میزائل مکہ مکرمہ کے علاقے کی جانب داغے گئے تھے۔ فضائی دفاعی نظام نے انہیں روک کر تباہ کردیا۔
سعودی عرب کا حوثیوں پر الزام
سعودی سول ڈیفنس نے جمعرات کی علی الصبح جاری بیان میں میزائل حملے کا الزام حوثی ملیشیا پر عائد کیا۔
ادارے نے کہا کہ شہری مقامات کو نشانہ بنانا بین الاقوامی انسانی قانون کی کھلی خلاف ورزی ہے۔ یہ اقدام حوثیوں کے خطرناک جارحانہ رویے کی عکاسی کرتا ہے۔
تاحال سعودی عرب کے الزام پر حوثیوں کا ردعمل سامنے نہیں آیا۔ واقعے کی آزادانہ تصدیق بھی نہیں ہوسکی۔
