وزیراعظم شہباز شریف نے ترک صدر رجب طیب اردوان اور خاتونِ اول امینہ اردوان سے ملاقات کی۔ انہوں نے اقوام متحدہ کے سیکریٹری جنرل انتونیو گوتریس سے بھی ملاقات کی۔
ایرانی صدر سے دوطرفہ تعلقات پر گفتگو
وزیراعظم شہباز شریف اور ایرانی صدر مسعود پزشکیان کے درمیان ملاقات میں دوطرفہ تعلقات اور باہمی تعاون کے فروغ پر تبادلہ خیال ہوا۔
دونوں رہنماؤں نے علاقائی صورتحال اور خطے میں امن و استحکام سے متعلق امور پر بھی گفتگو کی۔
شام، بنگلہ دیش اور سعودی عرب کے حکام سے ملاقاتیں
وزیراعظم نے شام کے صدر احمد الشرع اور بنگلہ دیش کے وزیراعظم طارق رحمان سے بھی الگ الگ ملاقاتیں کیں۔
اس کے علاوہ انہوں نے سعودی عرب کے وزیر برائے توانائی اور وزیر مملکت برائے خارجہ امور سے بھی ملاقات کی۔
فلسطینی عوام کے ساتھ یکجہتی کا اظہار
شہباز شریف نے اسلامی تعاون تنظیم کے سیکریٹری جنرل اسماعیل اولد شیخ احمد اور فلسطین کے وزیراعظم محمد مصطفیٰ سے بھی ملاقات کی۔
وزیراعظم نے فلسطینی عوام کے ساتھ حکومت اور پاکستان کے عوام کی جانب سے بھرپور یکجہتی کا اظہار کیا۔
فلسطینی وزیراعظم محمد مصطفیٰ نے عالمی سطح پر فلسطینی عوام پر مظالم کے خلاف مؤثر آواز اٹھانے اور فلسطینی مؤقف کی حمایت کرنے پر حکومت پاکستان اور پاکستانی عوام کا شکریہ ادا کیا۔
ورلڈ بینک کے صدر سے بھی ملاقات
وزیراعظم شہباز شریف نے ورلڈ بینک کے صدر اجے بنگا سے بھی ملاقات کی۔
مختلف ملاقاتوں میں دوطرفہ تعلقات کے فروغ، علاقائی صورتحال اور موسمیاتی تبدیلی کے منفی اثرات پر تبادلہ خیال کیا گیا۔
رہنماؤں نے موسمیاتی تبدیلی سے سب سے زیادہ متاثر ہونے والے ممالک کے مسائل کو عالمی سطح پر اجاگر کرنے کی اہمیت پر بھی گفتگو کی۔
