اسلام آباد میں وفاقی وزیر خزانہ و محصولات سینیٹر محمد اورنگزیب کی زیر صدارت کابینہ کمیٹی برائے سرکاری ملکیتی اداروں کا اجلاس ہوا۔ اجلاس میں مختلف سرکاری کمپنیوں کے بورڈ آف ڈائریکٹرز سے متعلق اہم انتظامی امور کا جائزہ لیا گیا۔
وزارت خزانہ میں ہونے والے اجلاس میں وفاقی وزیر سائنس و ٹیکنالوجی خالد حسین مگسی، متعلقہ وفاقی سیکریٹریز اور مختلف وزارتوں، ڈویژنز اور ریگولیٹری اداروں کے سینئر حکام نے شرکت کی۔
نیسپاک، حیسکو اور سیپکو سے متعلق تجاویز منظور
اجلاس میں سرکاری اداروں کے انتظامی ڈھانچے اور بورڈز میں تقرریوں سے متعلق دو اہم تجاویز پیش کی گئیں۔
پہلی تجویز میں نیشنل انجینئرنگ سروسز پاکستان (نیسپاک) کے چیئرمین یا آزاد ڈائریکٹر کی تقرری شامل تھی۔
دوسری تجویز کے تحت حیدرآباد الیکٹرک سپلائی کمپنی (حیسکو) کے بورڈ آف ڈائریکٹرز کی ازسرنو تشکیل اور سکھر الیکٹرک پاور کمپنی (سیپکو) کے بورڈ میں ایک آزاد ڈائریکٹر کی تقرری پر غور کیا گیا۔
تفصیلی غور و خوض کے بعد کمیٹی نے دونوں تجاویز کی منظوری دے دی۔
سرکاری اداروں کے بورڈز میں تقرریوں کے لیے اہلیت پر زور
وزیر خزانہ محمد اورنگزیب نے ہدایت کی کہ سرکاری اداروں کے بورڈز میں بطور عہدہ خدمات انجام دینے والے حکومتی نمائندوں کا انتخاب اہلیت اور تجربے کی بنیاد پر کیا جائے۔
انہوں نے زور دیا کہ متعلقہ افسران پیشہ ورانہ صلاحیتوں کے حامل ہوں۔ انہیں اپنے اداروں، وزارتوں اور ڈویژنز کے امور کا ضروری فہم بھی حاصل ہونا چاہیے، تاکہ وہ مؤثر انداز میں حکومتی نمائندگی کرسکیں۔
