ناظم آباد میں شاہین فورس پولیس کے مقابلے کے بعد گرفتار دونوں ملزمان کی شناخت کرلی گئی ہے۔ پولیس کے مطابق دونوں ملزمان کا سابقہ کریمنل ریکارڈ بھی سامنے آگیا ہے۔
ایس ایس پی ڈسٹرکٹ سینٹرل ڈاکٹر محمد عمران خان کے ترجمان کے مطابق گرفتار ملزمان کی شناخت آفتاب ولد غلام مصطفیٰ اور عمیر ولد رشید احمد کے نام سے ہوئی ہے۔ پولیس نے آفتاب کو بغیر زخمی ہوئے جبکہ عمیر کو زخمی حالت میں گرفتار کیا۔
ملزمان سے پستول، موبائل فون اور موٹر سائیکلیں برآمد
پولیس کے مطابق گرفتار ملزمان کے قبضے سے ایک پستول، تین موبائل فون اور دو موٹر سائیکلیں برآمد ہوئیں۔
برآمد ہونے والی موٹر سائیکلوں میں ایک 125 اور دوسری 150 شامل ہے۔ پولیس کا کہنا ہے کہ ملزمان نے یہ دونوں موٹر سائیکلیں ناظم آباد کی حدود سے شہری سے چھینی تھیں۔
دونوں ملزمان کا سابقہ کریمنل ریکارڈ موجود
ترجمان ایس ایس پی ڈسٹرکٹ سینٹرل کے مطابق دونوں ملزمان سابقہ ریکارڈ یافتہ ہیں۔ وہ اس سے قبل بھی سنگین جرائم کے متعدد مقدمات میں گرفتار ہوچکے ہیں۔
پولیس کے مطابق زخمی ملزم کو طبی امداد فراہم کرنے کے بعد مزید قانونی کارروائی کے لیے منتقل کیا جا رہا ہے۔ دونوں ملزمان سے مزید تفتیش جاری ہے۔
حکام کا کہنا ہے کہ ملزمان کے دیگر کوائف اور مزید تفصیلات حاصل کی جا رہی ہیں۔ ان کے خلاف ضابطے کے مطابق قانونی کارروائی عمل میں لائی جا رہی ہے۔
