غزہ میں سردیوں کی پہلی شدید بارش نے اسرائیلی حملوں کے باعث بے گھر ہونے والے فلسطینی خاندانوں کی مشکلات میں اضافہ کر دیا ہے۔
موسلادھار بارش سے مختلف علاقوں میں قائم خیمہ بستیاں زیرِ آب آگئیں۔ ہزاروں خاندانوں کا سامان، بستر، کمبل اور گدے بھیگ گئے۔ متعدد عارضی پناہ گاہیں رہنے کے قابل نہیں رہیں۔
70 ہزار خیمے بارش سے متاثر
دستیاب اطلاعات کے مطابق گزشتہ 12 گھنٹوں کے دوران کم از کم 70 ہزار خیمے بارش کے پانی سے متاثر ہوئے۔ اس صورتِ حال سے دسیوں ہزار بے گھر فلسطینی شدید مشکلات کا شکار ہیں۔
متاثرہ خاندانوں میں خواتین، بچوں، بزرگوں اور بیمار افراد کی بڑی تعداد شامل ہے۔ بارش کے باعث انہیں عارضی پناہ گاہوں میں رہنے اور محفوظ مقامات تک پہنچنے میں مشکلات کا سامنا ہے۔
سول ڈیفنس کو 1500 ہنگامی کالز موصول
غزہ کی سول ڈیفنس سروس کے مطابق بارش شروع ہونے کے بعد صرف 10 گھنٹوں میں شہریوں نے مدد کے لیے تقریباً 1500 ہنگامی کالز کیں۔
سروس کے مطابق متعدد مقامات پر پانی کی سطح 30 سے 40 سینٹی میٹر تک بلند ہوگئی۔ اس کے باعث خیموں اور عارضی پناہ گاہوں میں مقیم افراد کو محفوظ مقامات پر منتقل ہونا پڑا۔
