امریکا کے نومنتخب پہلے مسلم سینیٹر عبدالرحمان محمد السید کی بھارتی نژاد اہلیہ سے شادی کا دلچسپ خاندانی قصہ سوشل میڈیا پر وائرل ہوگیا۔
عالمی خبر رساں ادارے کے مطابق عبدالرحمان محمد السید نے ایک پوڈکاسٹ میں اپنی شادی سے متعلق دلچسپ واقعہ بیان کیا تھا۔ انہوں نے بتایا کہ بھارتی نژاد ڈاکٹر سارہ جوکاکو سے شادی پر مصر سے آئے ان کے چچا نے حیرت کا اظہار کیا۔
چچا کے سوال پر سینیٹر کا دلچسپ جواب
عبدالرحمان محمد السید کے مطابق ان کے چچا نے پوچھا کہ مصر میں 8 کروڑ افراد موجود ہیں، لیکن انہوں نے شادی کے لیے بھارتی خاتون کا انتخاب کیوں کیا؟
اس سوال پر عبدالسید نے دلچسپ جواب دیا۔ انہوں نے کہا کہ بھارت میں ایک ارب افراد ہیں، اس لیے اعدادوشمار کے لحاظ سے بھارتی خاتون سے شادی کا امکان زیادہ تھا۔
یہ گفتگو ’’میٹ دی ریئل عبدالسید‘‘ نامی پوڈکاسٹ میں ہوئی تھی۔ اس کی ویڈیو رواں سال اگست میں یوٹیوب پر جاری کی گئی تھی۔
اب اس گفتگو کا مختصر حصہ سوشل میڈیا پلیٹ فارم ایکس پر دوبارہ تیزی سے پھیل رہا ہے۔
بھارتی ثقافت سے بھی گہرا تعلق
عبدالرحمان محمد السید اور ڈاکٹر سارہ جوکاکو کی شادی مئی 2006 میں ہوئی تھی۔ دونوں کی دو بیٹیاں ہیں۔
عبدالسید اپنی اہلیہ کے خاندان اور جنوبی بھارتی ثقافت سے تعلق پر بھی گفتگو کر چکے ہیں۔ وہ مذاقاً کہہ چکے ہیں کہ تقریباً دو دہائیوں کی شادی کے بعد وہ خود کو عرب سے زیادہ بھارتی محسوس کرتے ہیں۔
ان کی اہلیہ ڈاکٹر سارہ جوکاکو بھارتی نژاد امریکی خاندان سے تعلق رکھتی ہیں۔ ان کے آباؤ اجداد کا تعلق کرناٹک کے ساحلی شہر بھٹکل سے ہے۔
امریکا کے پہلے مسلم سینیٹر منتخب
عبدالرحمان محمد السید نے بدھ کو امریکی ریاست مشی گن سے ریپبلکن امیدوار مائیک راجرز کو شکست دے کر سینیٹ کی نشست جیتی۔
اس کامیابی کے بعد وہ امریکی تاریخ کے پہلے مسلمان سینیٹر منتخب ہوئے۔
