کراچی میں ایف آئی اے اینٹی ہیومن ٹریفکنگ سرکل نے دو مختلف کارروائیوں کے دوران مطلوب ملزمان کو گرفتار کرلیا۔
پہلی کارروائی میں عمرہ پیکیج فراڈ کے الزام میں اشتیاق علی کو گرفتار کیا گیا۔ ایف آئی اے کے مطابق ملزم نے 49 شہریوں سے تقریباً 70 لاکھ روپے وصول کیے، لیکن وعدے کے مطابق عمرہ ویزے فراہم نہیں کیے۔
جعلی ٹکٹ اور ہوٹل واؤچرز جاری کرنے کا الزام
ترجمان ایف آئی اے کے مطابق گرفتار ملزم اشتیاق علی میسرز کاروانِ سفر ٹریول اینڈ ٹورز سے وابستہ ہے۔
ابتدائی تحقیقات میں سامنے آیا کہ ملزم نے عمرہ ویزوں، فضائی ٹکٹوں اور سفری پیکیجز کی فراہمی کے نام پر شہریوں سے رقم وصول کی۔
تاہم، ملزم نے مبینہ طور پر جعلی فضائی ٹکٹ اور ہوٹل واؤچرز جاری کیے۔ اس کے خلاف تعزیراتِ پاکستان کی دفعات 406، 420 اور 109 کے تحت مقدمہ درج ہے۔
ایف آئی اے رقم کا سراغ لگانے اور دیگر ممکنہ متاثرین کی نشاندہی کے لیے بھی تحقیقات کر رہی ہے۔
2014 کے انسانی اسمگلنگ کیس کا اشتہاری ملزم گرفتار
دوسری کارروائی میں ایف آئی اے نے انسانی اسمگلنگ اور ویزا فراڈ کے 2014 میں درج مقدمے کے اشتہاری ملزم شہزاد بلوچ ولد محمد رفیق کو گرفتار کرلیا۔
ترجمان کے مطابق ملزم مقدمے میں نامزد تھا۔ عدالتی کارروائی میں پیش نہ ہونے پر متعلقہ عدالت نے اسے اشتہاری قرار دیا تھا۔
مقدمے کے مطابق مبینہ نیٹ ورک جعلی ویزوں کے ذریعے پاکستانی شہریوں کو بھاری رقوم کے عوض متحدہ عرب امارات بھیجنے میں ملوث تھا۔
ایف آئی اے نے شہزاد بلوچ کو 4 نومبر 2026 کو گرفتار کیا۔
مزید تحقیقات جاری
ایف آئی اے کے مطابق دونوں مقدمات میں مزید قانونی کارروائی اور تفتیش جاری ہے۔
ادارے کا کہنا ہے کہ یہ کارروائیاں شہریوں کو سفری اور ویزا فراڈ سے محفوظ رکھنے اور انسانی اسمگلنگ کے نیٹ ورکس کے خلاف اقدامات کا حصہ ہیں۔
