کراچی کی خستہ حال سڑکوں کے باعث پیپلز بس سروس کا روٹ آر تھری بھی متاثر ہوگیا ہے۔ انتظامیہ نے اس روٹ کا فاصلہ تقریباً 3 کلومیٹر کم کرنے کا فیصلہ کیا ہے۔
پیپلز بس سروس انتظامیہ کے مطابق پاور ہاؤس چورنگی سے ناصر جمپ تک چلنے والی آر تھری بس اب شان چورنگی پر اپنا سفر ختم کرے گی۔
سڑکوں کی خراب حالت روٹ میں تبدیلی کی وجہ
انتظامیہ کا کہنا ہے کہ متعلقہ سڑک کی خراب حالت کے باعث بسوں کو مسلسل نقصان پہنچ رہا ہے۔
پیپلز بس سروس کی گاڑیاں ٹوٹی پھوٹی اور خستہ حال سڑکوں پر چلانے کے لیے تیار نہیں کی گئیں۔
انتظامیہ کے مطابق سڑکوں کی مرمت اور بہتری کے لیے متعلقہ حکام سے متعدد بار رابطہ کیا گیا۔ تاہم صورت حال بہتر نہ ہونے کے باعث روٹ محدود کرنا پڑا۔
مزید روٹس بھی متاثر ہونے کا خدشہ
پیپلز بس سروس انتظامیہ نے خبردار کیا ہے کہ اگر سڑکوں کی حالت بہتر نہ بنائی گئی تو مزید بس روٹس بھی محدود کیے جاسکتے ہیں۔
اس صورت میں شہریوں کو پبلک ٹرانسپورٹ کی سہولت حاصل کرنے میں مشکلات کا سامنا کرنا پڑسکتا ہے۔
