لاہور کے قذافی اسٹیڈیم میں فخر زمان نے شاندار بیٹنگ کا مظاہرہ کیا۔ انہوں نے 99 گیندوں پر 127 رنز بنائے۔ ان کی اننگز میں 11 چوکے اور 6 چھکے شامل تھے۔
یہ فخر زمان کی ون ڈے کرکٹ میں 12ویں سنچری ہے۔ کسی ون ڈے ٹورنامنٹ کے فائنل میں یہ ان کی دوسری سنچری بھی ہے۔
اس سے قبل فخر زمان نے 2017 میں چیمپئنز ٹرافی کے فائنل میں بھارت کے خلاف سنچری بنائی تھی۔ یہ میچ لندن کے اوول کرکٹ گراؤنڈ میں کھیلا گیا تھا۔
حالیہ سنچری کے ساتھ فخر زمان نے سعید انور کا ریکارڈ برابر کردیا۔ سعید انور نے بھی ون ڈے ٹورنامنٹس کے فائنلز میں دو سنچریاں بنائی تھیں۔
سعید انور نے پہلی سنچری 1993 میں وِلز ٹرافی کے فائنل میں سری لنکا کے خلاف بنائی۔ ان کی دوسری سنچری 1998 میں سلور جوبلی انڈیپنڈنس کپ کے دوران بھارت کے خلاف آئی تھی۔
فخر زمان نے اسی میچ میں ون ڈے کیریئر کے 4 ہزار رنز بھی مکمل کرلیے۔ وہ یہ سنگ میل عبور کرنے والے پاکستان کے 16ویں بلے باز بن گئے ہیں۔
اس فہرست میں انضمام الحق، جاوید میانداد، یونس خان اور سعید انور جیسے نامور بلے باز شامل ہیں۔
فخر زمان اب تک 96 ون ڈے اننگز کھیل چکے ہیں۔ انہوں نے 44.65 کی اوسط اور 93.57 کے اسٹرائیک ریٹ سے 4,019 رنز بنائے ہیں۔
ان کے ون ڈے ریکارڈ میں 12 سنچریاں اور 19 نصف سنچریاں شامل ہیں۔
