امریکی صدر ڈونلڈ ٹرمپ نے ایران کو نئی وارننگ دے دی۔ ان کا کہنا ہے کہ ایران کی ایک یا دو جوہری تنصیبات اب بھی امریکی کارروائی سے محفوظ ہیں۔
ٹرمپ نے دعویٰ کیا کہ ضرورت پڑنے پر امریکی فوج انہیں صرف 10 منٹ میں نشانہ بنا سکتی ہے۔
ایران کے ساتھ مذاکرات پر بات کرتے ہوئے امریکی صدر نے کہا کہ بات چیت درست سمت میں آگے بڑھ رہی ہے۔ ان کے مطابق ایران بھی معاہدہ کرنے میں دلچسپی رکھتا ہے۔
تاہم واشنگٹن اس معاملے میں جلد بازی نہیں کرنا چاہتا۔ ٹرمپ نے ایران کے طرزِعمل پر عدم اعتماد کا اظہار بھی کیا۔
ان کا کہنا تھا کہ تہران معاہدے کے بعد اپنے وعدوں سے پیچھے ہٹ جاتا ہے۔ اسی لیے ایران کو زیادہ قابلِ بھروسا نہیں سمجھتے۔
ٹرمپ نے کہا کہ اب دیکھنا ہوگا کہ ایران واقعی کسی معاہدے تک پہنچتا ہے یا نہیں۔
ایران پر دوبارہ حملوں سے متعلق سوال پر ٹرمپ نے اسے بے وقوفانہ سوال قرار دیا۔ تاہم انہوں نے دعویٰ کیا کہ امریکا پہلے ہی ایران کی بحریہ اور فضائیہ کو نشانہ بنا چکا ہے۔
ان کے مطابق امریکی کارروائیوں میں ایران کا فضائی دفاعی نظام اور متعدد جوہری تنصیبات بھی نشانہ بنیں۔
ٹرمپ نے دوبارہ کہا کہ ایک یا دو جوہری تنصیبات پر کارروائی باقی ہے۔ ضرورت پڑنے پر امریکی فوج انتہائی مختصر وقت میں انہیں نشانہ بنا سکتی ہے۔
