ہالی ووڈ کے آنجہانی اداکار میتھیو پیری کی زندگی اور فنی سفر پر مبنی نئی ڈاکیومنٹری سیریز ’دی ون اباؤٹ میتھیو پیری‘ نیٹ فلکس پر ریلیز کردی گئی ہے۔
تین اقساط پر مشتمل اس سیریز میں اداکار کی زندگی کے مختلف پہلوؤں کا جائزہ لیا گیا ہے۔ اس میں نشے کی لت، بحالی کی کوششوں اور 2018 میں پیش آنے والی سنگین طبی پیچیدگی پر بھی روشنی ڈالی گئی ہے۔
ڈاکیومنٹری میں قریبی افراد کے انٹرویوز
سیریز میں میتھیو پیری کی بہن میا پیری بووک، دوستوں، سابقہ گرل فرینڈز اور بحالی کے سفر میں ان کے ساتھیوں کے انٹرویوز شامل ہیں۔
تاہم مقبول امریکی سیریز ’فرینڈز‘ کے پانچ مرکزی ساتھی اداکار اس ڈاکیومنٹری میں شریک نہیں ہوئے۔ ان میں جینیفر اینسٹن، کورٹنی کاکس، لیزا کڈرو، ڈیوڈ شوئمر اور میٹ لی بلانک شامل ہیں۔
فرینڈز کی کاسٹ نے شرکت سے گریز کیوں کیا؟
ڈاکیومنٹری کی ہدایت کارہ میری رابرٹسن کے مطابق انہوں نے ’فرینڈز‘ کے پانچوں اداکاروں سے رابطہ کیا تھا۔ تاہم تمام اداکاروں نے اس منصوبے میں شرکت نہ کرنے کا فیصلہ کیا۔
ہدایت کارہ نے واضح کیا کہ ’فرینڈز‘ کی کاسٹ میتھیو پیری سے محبت کرتی تھی۔ ان کی موت کا دکھ آج بھی اداکاروں کے دلوں میں موجود ہے۔
