کراچی کے ضلع ویسٹ میں تھانہ اقبال مارکیٹ کی حدود یعقوب آباد میں پولیس اور شاہین فورس نے مبینہ مسلح ڈاکوؤں کے ساتھ مقابلے کے بعد تین ملزمان کو گرفتار کر لیا۔ ایس ایس پی ویسٹ طارق الٰہی مستوئی کے مطابق فائرنگ کے تبادلے میں ایک ملزم زخمی ہوا، جبکہ دو ملزمان کو بغیر گولی لگے گرفتار کیا گیا۔
پولیس کے مطابق گرفتار ملزمان کی شناخت آصف دانیال ولد محمد آفاق، کمال حسین ولد محمد شہادت اور عمیر عالم ولد منظر عالم کے نام سے ہوئی ہے۔ آصف دانیال مقابلے کے دوران زخمی ہوا۔
پولیس نے ملزمان کے قبضے سے غیر قانونی اسلحہ، گولیاں، فائرنگ کے خول، موبائل فونز اور نقدی برآمد کرنے کا دعویٰ کیا ہے۔ ملزمان کے زیرِ استعمال موٹرسائیکل بھی تحویل میں لے لی گئی ہے۔
پولیس کے مطابق زخمی ملزم کو طبی امداد کے لیے اسپتال منتقل کیا گیا، جبکہ دیگر گرفتار ملزمان کو تھانے لے جایا جا رہا ہے۔ حکام نے بتایا کہ واقعے کی قانونی کارروائی جاری ہے اور گرفتار ملزمان کا سابقہ مجرمانہ ریکارڈ بھی حاصل کیا جا رہا ہے۔
