کراچی: ولیکا اسپتال میں مبینہ طبی غفلت کے باعث بچوں میں ایچ آئی وی پھیلنے کے معاملے پر متاثرہ بچوں کے وکیل طارق منصور نے وفاقی حکومت سے مشترکہ تحقیقاتی ٹیم (جے آئی ٹی) تشکیل دینے کا مطالبہ کیا ہے۔
ایڈووکیٹ طارق منصور نے الزام لگایا کہ سندھ حکومت اس معاملے کو دبانے کی کوشش کر رہی ہے۔ ان کے مطابق ولیکا اسپتال میں مبینہ طبی غفلت کے نتیجے میں 169 سے زائد بچے ایچ آئی وی سے متاثر ہوئے، جبکہ متاثرہ بچوں کی تعداد تقریباً 200 تک پہنچنے کا خدشہ ہے۔
وکیل نے دعویٰ کیا کہ اب تک ایچ آئی وی سے متاثرہ 9 بچے جاں بحق ہو چکے ہیں۔ انہوں نے کہا کہ سندھ حکومت کی جانب سے تشکیل دی گئی تحقیقاتی کمیٹی کی رپورٹ تاحال پیش نہیں کی گئی اور واقعے کا مقدمہ بھی درج نہیں ہوا۔
طارق منصور نے وزیر اعظم سے اپیل کی کہ وہ پاکستان کمیشن آف انکوائری ایکٹ کی دفعہ 3 کے تحت وفاقی سطح پر مشترکہ تحقیقاتی ٹیم تشکیل دیں تاکہ معاملے کی شفاف تحقیقات ہوسکیں اور ذمہ داروں کا تعین کیا جا سکے۔
انہوں نے عوام سے بھی اپیل کی کہ وہ سوشل میڈیا پر #JusticeForWalkaHospital کو ٹرینڈ بنائیں تاکہ متاثرہ بچوں اور ان کے خاندانوں کے لیے انصاف کا مطالبہ اجاگر کیا جا سکے۔
تاہم، بچوں میں ایچ آئی وی کے پھیلاؤ کی وجوہات، مبینہ طبی غفلت اور ذمہ داروں سے متعلق ان دعوؤں کی آزادانہ تصدیق اور سرکاری تحقیقاتی نتائج سامنے آنا ابھی باقی ہیں۔
