کراچی میں کیماڑی پولیس نے گزشتہ 24 گھنٹوں کے دوران مختلف کارروائیاں کرتے ہوئے 47 ملزمان کو گرفتار کرلیا۔
پولیس ترجمان کے مطابق گرفتار افراد میں 2 مبینہ اسٹریٹ کرمنلز، 2 منشیات فروش، ایک اشتہاری اور ایک مفرور ملزم شامل ہیں۔ کارروائیوں کے دوران 3 گٹکا فروش اور 28 غیر قانونی افغان شہری بھی گرفتار کیے گئے۔ دیگر جرائم میں ملوث 10 افراد کو بھی حراست میں لیا گیا۔
پولیس نے گرفتار افراد کے قبضے سے 2 پستول برآمد کیے۔ کارروائیوں میں 570 گرام چرس اور 14 گرام آئس بھی ملی۔
ترجمان کے مطابق پولیس نے چوری شدہ موبائل فون اور موٹرسائیکل بھی برآمد کی۔ اس کے علاوہ 19 کلو گرام گٹکا ماوا اور 210 لیٹر اسمگل شدہ ڈیزل بھی قبضے میں لیا گیا۔
پولیس نے گرفتار ملزمان کے خلاف متعلقہ دفعات کے تحت مقدمات درج کرلیے ہیں۔ حکام کے مطابق تمام مقدمات میں مزید تفتیش جاری ہے۔
