کراچی کے علاقے ناگن چورنگی کے قریب شہریوں نے دو مبینہ ڈاکوؤں کو پکڑ کر تشدد کا نشانہ بنایا، جبکہ ان کا ایک ساتھی فرار ہوگیا۔
واقعہ نیو کراچی تھانے کی حدود میں صدیق اکبر مسجد کے قریب پیش آیا۔ مشتعل شہریوں نے دونوں ملزمان پر لاتوں اور گھونسوں سے حملہ کیا۔
اطلاع ملنے پر پولیس موقع پر پہنچی اور دونوں زخمی ملزمان کو حراست میں لے کر تھانے منتقل کردیا۔
ایس ایچ او نیو کراچی فرخ شہریار کے مطابق گرفتار ملزمان کی شناخت غلام مصطفیٰ ولد غلام حسین اور نثار ولد اسحاق کے نام سے ہوئی ہے۔
پولیس نے ملزمان کے قبضے سے شہری سے چھینا گیا پرس، موبائل فون اور اسلحہ برآمد کرنے کا دعویٰ کیا ہے۔
ایس ایچ او کے مطابق گرفتار ملزمان کا سابقہ مجرمانہ ریکارڈ بھی چیک کیا جا رہا ہے۔
